अनुभव ते अनुभूती वैयक्तिकतेतून
वैश्विकतेकडे जाणारा लेखनप्रवास

एक लेखिका म्हणून "मी कोण?", या प्रश्नाचं उत्तर मला त्या मानाने सहजसाध्य वाटतं. मी म्हणजे माणूसपणाचा एक अंश; वैयक्तिक ते वैश्विक असा प्रवास करत जाणारा एक बिंदू.. पायांना इच्छांचे मन फुटलेला.. दिसेल ते ऐकायला आसावलेला.. डोळ्यांत कुतुहल साठवलेला.. सर्वकाही जाणून घेणारा, कळलेल्याची आवर्तनं करणारा.. अनुभवातून अज्ञात दुवे सांधू बघणारा.. ओंजळभर असलेलं आभाळभर पेरत नेणारा.. आज पेक्षा उद्या समृद्ध होत जाणारा.. ह्या प्रवासात मुठीत मावणाऱ्या सावलीखाली पहुडून दूरवरची गीतं ऐकणारा, खूप मागचं आसुसून आठवू बघणारा.. आपली मुळं खणू इच्छिणारा..तांड्यातील प्रवाशांच्या कथा मनात साठवणारा.. सतत काहीतरी शोषत जात विश्वाचा नकाशा उलगडून त्यात स्वतःचा ध्रुवतारा शोधणारा !

अन मग एक दिवस असा उजाडतो की साठवलेला सगळा खजिना दुथडी भरून वाहायला लागतो. पाऊस वाऱ्यात अन नितळ सूर्यप्रकाशात एक इंद्रधनुष्य निर्माण होतं. समुद्रमंथनाच्या वरताण त्यातून अद्भुत चीजा प्रकटतात आणि नवरसांचे गंध ल्यालेल्या कथांचे तरंग त्यातून ठिबकतात. टपटप् वाजू लागतात.. हळुवारपणे निथळू लागतात. हा प्रवास जगत जाणं, त्यांची गीतं गात पुढे वाटचाल करणं.. तुडुंब भरत जाणं अन रितं होणं, म्हणजेच माझं लिहित जाणं!